الصورة دى ممكن تكون بتفكر ناس كتيرة بالمسرح,
بس انا
عمرى ماقتنعت بكده, دائما مقتنع
انها بتمثل الحياة..
ممكن المعنيين صح...فى الاول والاخر الحياة الا مسرح كبير..
مرة حزن وبكاء ومرة تانية فرح وسعادة..
بس فى اكتر من كده كمان فى الحياة..فى سؤال..
انا مين؟ هو انا انا عشان بقول على نفسي انى انا؟
ولا انا اللى بظهر للناس انه انا؟
انا مين؟ انا ملامح وجهى؟ ولا صوتى؟ ولا نظرتى للناس؟
انا مين؟ انا احلامى ولا امالى ولا اللى انا بقرره لنفسي؟
مرة واحد كان بيعطى دورة تدريبية انا فيها سألنى انت عندك كام سنة, قلت له 18,
قال للناس كلهم اهو ده محتاج 18 سنة كمان عشان -"فعلًا" يعرف هو مين...
انا كتبت الموضوع ده عشان بدأت احس بنظرية الاقنعه..
بالنسبة لى النظرية دى ان الناس فى محاولة بحثهم عن نفسهم بيلبسو الاقنعة دى,
الاقنعة دى بتبقى فى صور مختلفة منهم قناع دايما يضحك عشان يخبى البكاء اللى جواه
ممكن واحد منهم بيظهر البلاهه والسذاجه مع انه مش كده خالص
وممكن بكل بساطة يبقى قناع جامد مش شرط عكس الشخصية الحقيقية لكن لأسباب ما... هدفه الوحيد يخفى الشخصية الحقيقية عن العيان..
الاسباب؟؟؟؟؟ كتيرة اوى ومقدرش احصرها
وبصراحه انا بحترم الناس اللى لابسه اقنعه دول كفاية لدرجة انى مش عايز ابدأ احلل فى اسبابهم..
لكن انا ممكن اتكلم عن اسبابى.
اه ...مانا التانى لابس قناع..
دمتم فى خير الى ان القاكم بالأسباب
5 comments:
بص يا باشا
اولا الحياة اشتغالات ... و الناس حركات
ثانيا الحياة برده عبارة عن حفلة تنكر
كل واحد بيلبس القناع اللى بيعجبه و يغيرة وقت ما هو عايز
يعنى من الاخر ...القناع ده بيتلبس بالمزاج ... مش بيبقى خصب عنك
القاك فى الحفلة :)
بس من غير قناع يا ريت علشان اعرفك :)
دايما بتشرف بوجودك على مدونتى ياباشا....
سيف ممكن تبقى اول مرة فى حياتى اضطر اختلف معاك فى حاجة انا موافقك عليها:) ...
بص انت صح فى الناس اللى فعلا مخادعه، لكن فعلا (ولما اتكلم عن الاسباب هتفهم كده) فى ناس اتغصبو على انهم يلبسو اقنعه او على الاقل عملو كده وهما متضايقين....
ومتخافش انت كده كده مش هتعرفنى بالنيو لوك :)
السلام عليكم ورحمة الله وبركاته
ازيك يا طارق
كل رمضان وانت طائع
موضوعك بصراحة حيرني او بمعنى اصح خوفني يمكن عشان انا بحب اكون صريحة مع الناس وواضحة في كل تصرفاتي بس في نفس الوقت او دايما الناس بتكون بالاقنعة دي واحيانا بضطر اواجه المواقف باني احط قناع على الرغم من ان انا مش باكون حباه المهم الموضوع جامد جدا وصادق جدا وهستنى البقية والاسباب
سلمى
السلام عليكم ازيك يا طارق انا
احمد ابوسريع
كل سنه وانت طيب وكل اللى تعرفهم فى خير وسعاده المهم
اعجبت كثيرا بموضوعك ده بس اختلف معاك فى حاجه صغيرة ان الناس مش شرط تلبس قناع لان من الممكن جدا تكون انت حاسس من ناحيه اللى قدامك بقناع او ان اللى قدامك حاسس بمشاعر ما مخليه اللى قدامه شايفه قناع يمكن يكون فرح شديد فى موقف عادى او حزن شديد فىموقف اخر او مجموعه من المشاعر لايستطيع من امامك التعبير عنها ليعتقد من امامه بوجود القناع.........واسف للأطاله
طبعا انا موفقة جدا على كلامك يا طارق كل واحد منا واولهم انا عايشةباكتر من قناع واحد فى البيت وواحد برة وواحد مع القريبين منى
لغاية مبقتش عارفه اصلا انى القناع وانى الحقيقه ؟ لانى عندى واحد اخطر حلبسه وانا مع نفسى (حقيقة*)ـ
وسط كل ده بيجى وقت تشوف الناس على حقيقتهم وتشوف نفسك كمان ..وبيتبقى دى اكبر ضربة خدتها فى حياتك خصوصا لو كانوا مهين فى حياتك ووقتها متقدرش تلومهم اصلا لانك عملت زيهم
...مستنية اسبابك وعلاج لعله يصلح لحالتى
Post a Comment